ინტერიერის დიზაინი არ არის მხოლოდ სივრცეების გაფორმება – ესაა ხელოვნება, რომელიც ცხოვრებას ორგანიზებულ, კომფორტულ და ესთეტიკურ სახეს აძლევს. დიზაინერების მიერ წარმოთქმული ფრაზები ხშირად ხდება შთაგონების წყარო. მათი ციტატები არა მხოლოდ მათ ხედვასა და გამოცდილებას გამოხატავს, არამედ დიზაინის უნივერსალურ წესებსაც ამჟღავნებს.
ამ სტატიაში განვიხილავთ ინტერიერის დიზაინის ყველაზე ცნობილ 5 ციტატას, მათ მნიშვნელობასა და გზავნილს, რომელიც მათ უკან იმალება.
„იყავით საკუთარი გემოვნების ერთგული, რადგან ის, რაც ნამდვილად მოგწონთ, არასდროს გადადის მოდიდან” – ინტერიერის დიზაინერი ბილი ბოლდუინი.
ეს ციტატა ხაზს უსვამს ინდივიდუალური გემოვნების უნიკალურობასა და სიმყარეს ინტერიერის დიზაინში. ის შეგვახსენებს, რომ დიზაინის მთავარი მიზანი სივრცეში საკუთარი იდენტობის გამოხატვაა და არა უბრალოდ ტრენდების მიმართ დამოკიდებულება. ინტერიერის დიზაინში ყველაზე ფასეულია საკუთარი პიროვნების და გემოვნების გამოხატვის თავისუფლება. აირჩიეთ ის ფერები, ტექსტურები და ავეჯი, რომელიც თქვენს ხასიათს უფრო კარგად გამოხატავს.
„საუკეთესო სივრცეებს ყოველთვის აქვთ რაღაც სათქმელი მათში მცხოვრებ ადამიანებზე“ – ინტერიერის დიზაინერი დევიდ ჰიქსი.
ეს ციტატა გვაჩვენებს, რომ ინტერიერის დიზაინი არ არის მხოლოდ ვიზუალური აქცენტი, არამედ იგი წარმოაჩენს ადამიანის ცხოვრებასა და პიროვნებას. სივრცე, რომელშიც ადამიანი ცხოვრობს, არ უნდა იყოს მხოლოდ ფორმა და ფუნქცია, ის ასევე აღწერს პიროვნების ისტორიას, მის შეხედულებებს, ინტერესებსა და ცხოვრებისეულ პრინციპებს. თუ ინტერიერი უნიკალურია და თანხვედრაშია მფლობელის ხასიათთან, ის არა მხოლოდ ფუნქციური და კომფორტულია, არამედ მეტად ჰარმონიულიც. თითოეული დეტალი, იქნება ეს ავეჯი, დეკორი თუ არქიტექტურა, რაღაცას ამბობს მფლობელის ისტორიაზე. ეს შეიძლება იყოს მოგზაურობისას ნაპოვნი ნივთები, მემკვიდრეობით მიღებული ავეჯი ან უბრალოდ პირადი გემოვნების განსაკუთრებული გამოხატულება.
„დიზაინი მუდმივი გამოწვევაა, რომ დავიცვათ ბალანსი კომფორტსა და ესთეტიკურობას შორის, პრაქტიკულობასა და ჩვენს სურვილებს შორის“ – დონა კარანი.
ეს ციტატა ეხება იმ უწყვეტ გამოწვევას, რომელსაც დიზაინის შექმნისას ვაწყდებით, ფუნქციონალურობასა და ესთეტიკას შორის არსებულ დაპირისპირებას, რაც ასევე გვხვდება კომფორტსა და ფუფუნებას შორის არჩევანის დროს. დიზაინს აქვს ფუნქციური როლი, რომელიც მომხმარებლის ყოველდღიურ საჭიროებებს უნდა ერგებოდეს, სთავაზობდეს კომფორტს და ამავდროულად ფუფუნების განცდას. ის ასევე უნდა ასახავდეს ადამიანის გემოვნებასა და სურვილს, შექმნას რაღაც განსაკუთრებული, უნიკალური და ესთეტიკური. ეს სიმარტივისა და ელეგანტურობის ერთობლიობაა. განსაზღვრეთ თუ რა არის მთავარი თქვენს ინტერიერში, პრაქტიკულობა და კომფორტი თუ ესთეტიკა?
“არ არსებობს ისეთი ცუდი სახლი, რომლის გადაქცევაც არ შეიძლება რაიმე ღირებულად”, – ელსი დე ვოლფი.
ეს ფრაზა ასახავს იდეას, რომლის მიხედვითაც ინტერიერის დიზაინსა და სივრცის მოწყობას შეუძლია გააცოცხლოს ნებისმიერი სახლი, მიუხედავად იმისა, თუ რამდენად არასასიამოვნო იყო იგი თავდაპირველად. ფრაზა აჩვენებს იმ ძალას, რომელსაც დიზაინი ფლობს. ინტერიერის დიზაინი არის გარდაქმნის პროცესის ნაწილი, რომლის მეშვეობითაც ნებისმიერი სახლი ან სივრცე შეიძლება გახდეს უფრო ეფექტური და ფუნქციური. ცუდი პირობების მიუხედავად, სწორად გაკეთებულ დიზაინს შეუძლია აღმოაჩინოს სივრცის პოტენციალი. ეს მოიცავს როგორც ავეჯის სწორ განლაგებას, ისე ბუნებრივი შუქის უკეთ გამოყენებას. დიზაინი არ არის მხოლოდ დიდ ხარჯებთან დაკავშირებული ცვლილებები, ის შეიძლება იყოს ძველი ავეჯის რესტავრაცია, ფერის შეცვლა ან ახალი აქსესუარის დამატება. სივრცის სირთულეები არ უნდა იყოს შეზღუდვა, არამედ გამოწვევა.
”სკამები ცალსახად არის დიზაინის საუკეთესო გამოხატულება. ისინი აერთიანებს უფრო მეტ ჩემს ცხოვრებისეულ და კარიერულ გამოწვევას, ვიდრე ავეჯის სხვა რომელიმე კომპონენტი,” – ამბობს ინტერიერის დიზაინერი, ვლადიმირ კაგანი.
კაგანი ცნობილია ავეჯის თანამედროვე და ინოვაციური დიზაინის შექმნით, რომელიც ხასიათდება ორგანული ფორმებით. მისი ცნობილი ციტატა ასახავს სკამების, როგორც დიზაინის ობიექტის მნიშვნელობას ინტერიერში, რომელსაც არა მხოლოდ პრაქტიკული დატვირთვა აქვს, არამედ ესთეტიკურიც. სკამი ავეჯის ის სახეობაა, რომელსაც ადამიანები ყოველდღიურად იყენებენ. სწორედ ამიტომ, მისი დიზაინი მოითხოვს ბალანსს ესთეტიკასა და ფუნქციონალობას შორის. არჩევანი უნდა იყოს ისეთი, რომელიც მომხმარებელს კომფორტს შეუქმნის, თუმცა იქნება ვიზუალურად მიმზიდველიც. სკამი შეიძლება იყოს მარტივი კონსტრუქციის, მაგრამ მისი დიზაინი მოითხოვდეს განსაკუთრებულ ყურადღებას მცირე დეტალებზე, როგორებიცაა ფორმა, ტექსტურა და ფერების კომბინაცია.
ინტერიერის დიზაინი აერთიანებს სივრცეების ესთეტიკას, კომფორტსა და ფუნქციონალურობას და ქმნის გარემოს, რომელიც აღწერს ჩვენს ყოველდღიურობას. ზოგჯერ იმისათვის, რომ დავრწმუნდეთ ჩვენს არჩევანში, გვჭირდება საქმის კომპეტენტური ადამიანის რჩევები, რომელიც გაგვიზიარებს თავის გამოცდილებაზე დაფუძნებულ ხედვებს, რაც სამომავლოდ ჩვენი შთაგონების წყარო გახდება.
