ღია მწვანე ფერი ინტერიერში ერთ-ერთი ყველაზე მშვიდი და ჰარმონიული არჩევანია, რომელიც ხელს უწყობს სუფთა და მსუბუქი გარემოს შექმნას. თავისი მახასიათებლებიდან გამომდინარე, განსაკუთრებით შესაფერისია საძინებლებისთვის, სააბაზანოებისთვისა და მოსასვენებელი სივრცეებისთვის. ამასთან, როდესაც ღია მწვანე სხვა ფერებს ერწყმის, ინტერიერში მისი ეფექტი კიდევ უფრო ძლიერდება. დღევანდელ სტატიაში განვიხილავთ 5 ფერს, რომელთან კომბინაციაშიც ღია მწვანე ფერი იდეალურად გამოიყურება.
თეთრი
ღია მწვანე და თეთრი ერთად ჰარმონიულ ატმოსფეროს ქმნის. ამ ორი ფერის შერწყმით სივრცე უფრო მეტად ნათელი და მშვიდია. ამგვარი ფერთა კონტრასტი ხშირად გამოიყენება თანამედროვე და მინიმალისტურ დიზაინში, რათა შექმნას მარტივი და სუფთა ვიზუალი. თეთრ ფერთან შერწყმით ღია მწვანე ძირითადი აქცენტი ხდება. ასეთი კომბინაცია ძალიან ეფექტური და დახვეწილია არამარტო საცხოვრებელ, არამედ სამუშაო სივრცეებშიც, სადაც სიმშვიდე და პროდუქტიულობაა საჭირო.
კრემისფერი
ღია მწვანესა და კრემისფრის კომბინაცია ნაზ და ბუნებრივ იერს სძენს ინტერიერს. ეს ორი ფერი ერთად ხშირად გამოიყენება თანამედროვე ინტერიერის დიზაინში, რათა შეიქმნას ბალანსი ცივ და თბილ ტონებს შორის.
ვარდისფერი
ვარდისფერი ღია მწვანესთან კომბინაციაში გვთავაზობს რბილ და მყუდრო ატმოსფეროს. ეს ორი ფერი ერთმანეთს ჰაეროვნად ერწყმის და არ ქმნის შეუსაბამო კონტრასტებს. ვარდისფრისა და ღია მწვანეს კომბინაცია განსაკუთრებით იდეალურია საძინებელში და მისაღებ ოთახში.
წითელი
როდესაც ღია მწვანეს წითელ ფერს უხამებთ, სივრცეში ენერგიულობა და დინამიკა შეგაქვთ. წითელი თავის მხრივ ინტერიერში მუდამ დომინირებს, მწვანე კი სივრცეს ამშვიდებს, ამ ორი ფერის გაერთიანებით იღებთ დაბალანსებულ ფერთა პალიტრას. ეს კომბინაცია იდეალურია მათთვის, ვისაც სურს ინტერიერის მომხიბვლელი და რადიკალური ცვლილება.
ყავისფერი
ყავისფერი, როგორც ბუნებრივი და თბილი ელემენტი, იდეალურად ერწყმის ღია მწვანეს. ამ კომბინაციამ ინტერიერში შესაძლოა შეიტანოს ელეგანტური და თან ძალიან კომფორტული ატმოსფერო. ეს ორი ფერი ყველაზე ორგანულად ერწყმის ერთმანეთს, ისევე, როგორც ბუნებაში მწვანე მცენარეებისა და მიწის კონტრასტი.
რუბრიკა “ფერების” წარმდგენია კაპაროლი
