ესპანეთის ერთ-ერთ ყველაზე თვალწარმტაც ლოკაციაზე, ვალენსიის ქალაქ პიკანაში აგებულ ამ სახლს 240 კვადრატული მეტრის ფართობი გააჩნია და ის ხმელთაშუა ზღვიდან მობერილი ნიავითაა განებივრებული. მისი მფლობელ ახალგაზრდა წყვილს ორი შვილი ჰყავს, რაც იმას ნიშნავდა, რომ არქიტექტორები ტიპური გამოწვევის წინაშე აღმოჩნდნენ – მათ ოჯახის ყველა წევრისთვის უნდა გამოეყოთ და შეექმნათ ჯანსაღი და ფუნქციური სივრცე.
დამკვეთების თხოვნა იყო ისეთი საგარეო, სათამაშო სივრცის მოწყობა, სადაც ბავშვები შეძლებდნენ თამაშსა და ბუნების შეცნობას და რომელიც მშობლების მიერ გასაკონტროლებლად და სამეთვალყუროდ მარტივი იქნებოდა. ამავე დროს, არქიტექტორებმა წინასწარ გათვალეს იმ ოთახების რაოდენობა, რომლებიც სხვადასხვა აქტივობებისთვის იქნებოდა საჭირო და მხოლოდ ტერიტორიის ათვისებისა და სრული შესწავლის შემდეგ იმუშავეს სახლის არქიტექტურულ გეგმაზე.
როგორც არქიტექტურული სტუდია Valero y Ochando arquitectura-ს წარმომადგენლები აცხადებენ, დამკვეთებთან ცოცხალი და ხშირი კონტაქტის საშუალებით Hen House-ის პროექტი სიყვარულით შეიქმნა. შენობის ორ მხარეს არსებობს გამყოფი კედლები, რომელთა წყალობით იქმნება ორი გადამკვეთი ოთხკუთხედური პრიზმის ფორმა. ამ პრიზმებით არქიტექტორებმა ქალაქის რეგულაციების წამოყენებული პირობები მაქსიმალურად დამკვეთის სასარგებლოდ გამოიყენეს, ბუნებასაც შეუხამეს და ესპანურ უბანსაც.
სახლის ინტერიერი კიბის გარშემო შეიქმნა და მთელ შენობას აკავშირებს ერთმანეთთან, ჰორიზონტალურად და ვერტიკალურადაც. ქვედა სართული ღია დაგეგმარებით იქცევს ყურადღებას, თუმცა საჭიროების შემთხვევაში, მისი იზოლირებულ სივრცეებად ქცევაა შესაძლებელი.
შენობაში დატოვებულია ღიობები, საიდანაც მზის სინათლე მარტივად აღწევს და რომლებიც ჰაერის ვენტილაციასაც უწყობს ხელს. პრიზმული სტრუქტურის კედლები ზოგიერთ დაბოლოებაში მინითაა დაგვირგვინებული, ხანდახან კი ოთახების კონტურებს ავეჯი გამოკვეთს. სამზარეულო სასტუმრო ოთახისგან კედლითაა გამოყოფილი, რომელიც მოძრაობს და უჩინარდება. ამ გზით ხალხმრავალი თავყრილობებისას შესაძლებელია სამზარეულოსა და მისაღების გაერთიანება, სურვილის მიხედვით კი – გამოყოფაც.
სახლის სასტუმრო ოთახი გრძელდება საცურაო აუზით – ეს შტრიხი პროექტს განგრძობითობისა და მუდმივობის ილუზიით აგვირგვინებს.
ფოტოგრაფი: Milena Villalba
