როდესაც საქმე რემონტს ეხება, მნიშვნელოვანია სწორად შევარჩიოთ წელიწადის დრო, როდესაც სარემონტო სამუშაოებს დავიწყებთ, რადგან თითოეულ სეზონს სხვადასხვა სახის სირთულეები სდევს თან. დღევანდელ სტატიაში გიამბობთ თუ რა დადებითი და უარყოფითი მხარეები აქვს რემონტის კონკრეტულ სეზონებზე დაწყებას.
რომელი სარემონტო სამუშაოების დაწყება არის რეკომენდებული ზამთარში?
პირველ რიგში, უნდა განსაზღვროთ, რა სახის რემონტს აპირებთ. თუ თქვენ მხოლოდ კონკრეტული დეტალების შეცვლა გსურთ, მაგალითად, გინდათ, რომ სახლს ფანჯრები ან კარი შეუცვალოთ, მაშინ ეს ზამთარში არ უნდა გააკეთოთ, რადგან სახლში ტემპერატურა სწრაფად დაეცემა, რაც გამოიწვევს იატაკის საფარის ან შპალერის დაზიანებას. გარდა ამისა, ზოგიერთი სამშენებლო მასალის გამოყენება ზამთრის პერიოდში არ შეიძლება, რადგან ისინი დაბალ ტემპერატურაზე ნაკლებად ეფექტურად მუშაობენ.
მაგრამ ეს იმას არ ნიშნავს, რომ რემონტი მხოლოდ ზაფხულში ან გაზაფხულზე უნდა გაკეთდეს. ზამთარში დემონტაჟისა და სამშენებლო მასალების ფასები, ჩვეულებრივ, უფრო დაბალია, რადგან მათზე მოთხოვნა ეცემა, შესაბამისად, ზამთარი შესანიშნავი დროა მათთვის, ვისაც სახლის აშენება ან რემონტის გაკეთება ბიუჯეტურად სურს. ზამთრის პერიოდში მიზანშეწონილია კერამიკული ფილების შეცვლა, შპალერის გამოცვლა, კედლების შეღებვა, ჭერის შეთეთრება და ა.შ. ხოლო ელექტროსამონტაჟო სამუშაოების ჩატარება ნებისმიერ ამინდში შეიძლება.
რა სირთულეები ახლავს რემონტს ზაფხულის პერიოდში?
ზაფხულში ქალაქი მტვრის ნაწილაკებით ივსება, ქუჩებში ტენიანობა იკლებს და ფასები ზრდას იწყებს. თუ რემონტის გაკეთებას ზაფხულში აპირებთ, სჯობს საჭირო მასალა რამდენიმე თვით ადრე შეიძინოთ. ამას გარდა, უნდა გაითვალისწინოთ, რომ ხშირად ზაფხულში ტემპერატურა იმდენად მაღალია, რომ მთელი დღის განმავლობაში მუშაობა პრაქტიკულად შეუძლებელია, რაც იმას ნიშნავს, რომ თქვენს რემონტს შეიძლება იმაზე მეტი დრო დასჭირდეს, ვიდრე, მაგალითად, შემოდგომაზე ან გაზაფხულზე დასჭირდებოდა.
რომელ სეზონზეა მართებული სარემონტო სამუშაოების დაწყება?
რემონტის დაწყებას ექსპერტები გაზაფხულის თვეებში, კერძოდ კი აპრილსა და მაისში გვირჩევენ, როდესაც ჰაერი თბება, თუმცა ქუჩები მტვრით არ არის დაბინძურებული. ამასთან, სახლებში გათბობა უკვე გამორთულია და სხვადასხვა სახის ელექტრო სამუშაოებს შეუფერხებლად, ელექტროენერგიისა და გათბობისთვის საჭირო ხარჯების დაზოგვის პირობებში შეასრულებთ.
რა თქმა უნდა, ყოველ სეზონს აქვს დადებითი და უარყოფითი მხარეები, სწორედ ამიტომ უმჯობესია რემონტის დრო თქვენს ინდივიდუალურ მოთხოვნებსა და საჭიროებებს მოარგოთ და რემონტის დაწყებამდე დარგის ექსპერტებს მიმართოთ.
