ამ სივრცის მეპატრონე ახალგაზრდა გოგონაა, რომელმაც საკუთარი სახლის ინტერიერი პროფესიონალი დიზაინერის დახმარების გარეშე შექმნა.
ქეთო ძველ თბილისში გაიზარდა და მუდმივ საცხოვრებლადაც სწორედ ეს უბანი შეარჩია. თავდაპირველად, ბინა სხვაგვარად იყო დაპროექტებული და მან ყველაფერი ისე შეცვალა, რომ სივრცე საკუთარ გემოვნებასა და საჭიროებებს მორგებოდა: საძინებლის ადგილას სამზარეულო მოაწყო, მთავარი სასტუმრო ოთახი სამუშაო ზონას დაუთმო, საერთოდ არ გააკეთა ე.წ. “ტელევიზორის კუთხე” (შესაბამისად, არც ტელევიზორი აქვს) და შეიძინა არასტანდარტულად ღრმა, მაგრამ ძალიან კომფოტული რბილი ავეჯი.
ინტერიერში განსაკუთრებულ ყურადღებას იქცევს ქართული ფარდაგები, ძველმანებში შეძენილი ბროლის ჭაღები, ბეტონის თეთრი ჭერი და ბევრი მცენარე. წამყვან ფერებად გამოყენებულია თეთრი, ნაცრისფერი და გაცრეცილი ვარდისფერი, რომელთა კომბინაცია სასიამოვნო ვიზუალურ ეფექტს იძლევა.
ფოტოები: ბილი ბილიხოძე
