MUA Architecture & Placemaking-ის პროექტი “მწვანე კონცხი ბოტანიკო” 2024 წლის Archello Awards-ზე ფინალისტ 5 რჩეულ პროექტს შორის დასახელდა კატეგორიაში “Housing Project of the Year – Mid Rise”.
Archello Awards გახლავთ საერთაშორისო არქიტექტურული დაჯილდოება, რომელიც მთელი მსოფლიოს მასშტაბით ავლენს საუკეთესო არქიტექტურულ პროექტებს, ინტერიერის დიზაინებს და არქიტექტურულ ფირმებს სხვადასხვა კატეგორიაში.
წელს Archello Awards-ზე 1000-ზე მეტი ნამუშევრიდან შეირჩა MUA Architecture & Placemaking-ის პროექტი — მწვანე კონცხი ბოტანიკო და 5 რჩეულ ფინალისტ პროექტს შორის მოხვდა კატეგორიაში — “Housing project of the year – Mid rise”.
აღსანიშნავია, რომ თითოეულ კატეგორიაში ვლინდება 2 გამარჯვებული – ერთი შეირჩევა საერთაშორისო ჟიურის მიერ, მეორე კი საჯარო ხმის მიცემის წესით Archello Awards-ის ვებგვერდზე.
მწვანე კონცხი ბოტანიკო, რომელიც ბათუმის მახლობლად, მწვანე კონცხზე მდებარეობს, მრავალფუნქციური საცხოვრებელი კომპლექსია და მოიცავს ორ საცხოვრებელ კორპუსსა და სარეკრეაციო შენობას — House of Wellness. აღსანიშნავია, რომ MUA-ს გუნდმა პროექტისთვის შეიმუშავა გენერალური გეგმა, საცხოვრებელი, სარეკრეაციო შენობების არქიტექტურა და ინტერიერის დიზაინი.
უნდა ითქვას ისიც, რომ Archello Awards-ის კატეგორიაში ნომინირებული ამ პროექტის განსაკუთრებული მახასიათებელია თანამედროვე არქიტექტურისა და ბუნებრივი ლანდშაფტის ჰარმონიული შერწყმა მაცხოვრებლებისა და სტუმრების საჭიროებების გათვალისწინებით.
“ბოტანიკოში” ხელუხლებლად არის დატოვებული ძველი მარშრუტები, რომლებიც ორ ახალ საცხოვრებელ შენობას შორის მოექცა. ღია სასტუმროს ტიპოლოგია, რომელიც მჭიდრო კავშირშია მის შემოგარენთან, არქიტექტურა და დიზაინის კონცეფცია სიმარტივით არის ნაკარნახები და ხელს უწყობს კომპლექსის მაცხოვრებლებსა და ვიზიტორებს, სრული სიცხადით შეიგრძნონ გარშემო არსებული ბუნება.
MUA Architecture & Placemaking-ი 15-ზე მეტი წლის გამოცდილების მქონე არქიტექტურული ოფისია. მისი სამუშაო პრაქტიკა მოიცავს მრავალფეროვან პროექტებს, როგორც არქიტექტურის, ასევე ურბანული და სივრცითი დიზაინის მიმართულებით. მათ ნამუშევრებს მიეკუთვნება ისეთი მნიშვნელოვანი პროექტები, როგორებიცაა Fabrika Tbilisi, თბილისის პროკურატურის შენობა, მწვანე კონცხი ბოტანიკო, booking.com-ის რეგიონული ოფისი თბილისში და სხვ.
პროექტის დამკვეთი: Silk Road Group
გუნდი: დევი ქიტუაშვილი, გოგიკო საყვარელიძე, მარია ფელანგია, მარიტა რურუა | ბოკა კილასონია, ლევან ძეგველაშვილი
შესრულებული სამუშაო: გენერალური გეგმა, არქიტექტურა, ინტერიერის დიზაინი, ლანდშაფტის დიზაინი
ფოტო: გიორგი მამასახლისი
