აქსელ ვერვურდტი მსოფლიოში ერთ-ერთი ყველაზე გავლენიანი, მაღალანაზღაურებადი, და პოპულარული ინტერიერის დიზაინერია, რომელიც Architectural Digest-ის Hall of Fame-ში საპატიო ადგილს იკავებს. ვერვურდტი წარმოშობით ბელგიიდანაა – ის 1947 წელს დაიბადა ანტვერპენში და სწორედ ბელგიაში გადადგა პირველი ნაბიჯები დიზაინის სფეროში. მისი პირველი დიდი პროექტი 1969 წელს მე-16 საუკუნის სახლების შეძენა და მათი რესტავრირება იყო, რამაც დიზაინის ბიზნესით დააინტერესა.
1970-80-იან წლებში ვერვურდტი ხელოვნების ანტიკური ნიმუშების ყიდვა-გაყიდვით იყო დაკავებული და სწორედ ამ საქმიანობით გაითქვა სახელი. 1984 წელს მან ჩინური, მინგის დინასტიის დროს დამზადებული ლურჯ-თეთრი ფაიფურის 7400 ეგზემპლარი შეიძინა და პარიზის ანტიკვარების ბიენალეზე წარადგინა. ამავე წელს მან შეიძინა ანტვერპენთან ახლოს მდებარე, შუა საუკუნეებში აგებული სასახლე Kasteel van ‘s-Gravenwezel, სადაც ოჯახთან ერთად საცხოვრებლად გადავიდა. სასახლის მაგიური ექსტერიერ-ინტერიერი, რომლის განახლებაც ვერვურდტმა საკუთარ თავზე აიღო, მალევე გახდა პოპულარული და დააინტერესა მსოფლიო ინტერიერის დიზაინერთა და არქიტექტორთა წრეები – ამ დროს ის პირველად დაიბეჭდა ყველაზე გავლენიან არქიტექტურულ ჟურნალში Architectural Digest
1999 წელს დიზაინერმა შეიძინა მე-19 საუკუნის სადისტილაციო კომპლექსი, რომელსაც აქსელ ვერვდუდტის კომპანია ეწოდა და სადაც უამრავი მნიშვნელოვანი პროექტი განხორციელდა. 2007 წელს მან ვენეციის ბიენალესთან თანამშრომლობით მოაწყო გამოფენა, რომელსაც ერქვა Artempo : Where Time Becomes Art. 2011 წელს ვერვურდტმა საკუთარი ხელოვნების გალერეა დააარსა ანტვერპში, 2014 წელს კი ჰონგ კონგში.
ხელოვნების სფეროში ამხელა ღვაწლის მიუხედავად, ბევრის აზრით აქსელ ვერვურდტის ნამდვილი გენია მის მიერ შექმნილ ინტერიერის დიზაინებში გამოიხატება. დიზაინერს სწამს, რომ სახლი უნდა იყოს მისი მეპატრონის სულის ვიზუალიზაცია – ის უნდა გამოხატავდეს იმ ცხოვრებას, რომელიც გვსურს, რომ გვქონდეს, იდეებს, რომლებიც განაპირობებენ ჩვენს გემოვნებას, პერსპექტივას და მსოფლიოსთან კავშირს. სწორედ ამიტომ, მის მიერ შექმნილი ყოველი პროექტი ინდივიდუალური და უნიკალურია, თუმცა მათ შორის ერთი მსგავსება შეინიშნება – ყოველი მათგანი ძალიან ძვირადღირებული და ფუფუნებით აღსავსეა.
ვერვურდტის კლიენტებს შორის შედიან მსოფლიოს სხვადასხვა სამეფო ოჯახების წევრები, როკ ვარსკვლავები, ფინანსისტები, ტექნოლოგიის ინოვატორები, ხელოვანები… დიზაინერმა იმუშავა ისეთი ცნობილი ადამიანების სახლებზე, როგორებიც არიან რობერტ დე ნირო, ქანიე უესტი, კიმ კარდაშიანი, ბილ გეიტსი, სტინგი, კელვინ კლაინი და ა.შ. მისი მეტაფიზიკური სტილი მნახველებს უტოვებს შთაბეჭდილებას, რომ ის სივრცეები, რომლებზეც მან იმუშავა, არა ადამიანების მიერ შექმნილი, უბრალოდ ნაპოვნია. სხვადასხვა მასალის დაუმუშავებლად დატოვება, ბუნების ელემენტების ინტერიერში შეტანა, ლანდშაფტის არქიტექტურის დეტალური დამუშავება – ეს ის შტრიხებია, რომელიც ბელგიელი დიზაინერის ფილოსოფიაში მნიშვნელოვან როლებს ასრულებს.
აქსელ ვერვურდტის ნამუშევრების სიტყვებით დეტალურად აღწერა რთულია, ვინაიდან ის ვიზუალური ოსტატია, ამიტომ შესაფასებლად წარმოგიდგენთ მის რამდენიმე საკულტო ნამუშევარს :
