ყოფილი იპოდრომის ტერიტორიაზე მდებარე ბინის საერთო ფართობი 120 კვადრატულ მეტრს შეადგენს და მის დიზაინ პროექტზე ინტერიერის დიზაინერმა ანინია ფხაკაძემ იმუშავა.
როგორც პროექტის ავტორი გვიამბობს, დამკვეთის მთავარი სურვილი იყო, რომ ინტერიერი ფრანგულ სტილში ყოფილიყო შესრულებული. ამასთანავე აუცილებელი იყო სწორი გეგმარებითი სამუშაოების ჩატარება, რადგან ბინის მეპატრონეს სურდა იზოლირებული სამზარეულოს დაპროექტება. საპროექტო დავალება ასევე გულისხმობდა მთავარი საძინებლის სველ წერტილში როგორც აბაზანის, ასევე საშხაპის დამონტაჟებას.
აღნიშნული დავალების შესასრულებლად ანინია ფხაკაძემ პირველ რიგში, შეიმუშავა ბინის გეგმარების პროექტი, რომლის მიხედვით სივრცეში განთავსდა შესასვლელი, მისაღები ოთახი, იზოლირებული სამზარეულო, ორი საძინებელი და ორი სააბაზანო.
რაც შეეხება დიზაინ სტილს, ფრანგული შტრიხების შესატანად პროექტის ავტორმა გამოიყენა ხის პარკეტი და მოლდინგები. საერთო ფონის თვალსაზრისით, დიზაინერმა სისადავე აირჩია, შესაბამისად, მთავარი აქცენტი ავეჯსა და ფერად ელემენტებზე კეთდება.
მიუხედავად ფართის სიმცირისა, ანინია ფხაკაძემ შეძლო სამზარეულოს იზოლირება თანამედროვე სტილის შუშის ტიხრის მეშვეობით, რომელიც საკმაოდ კარგად მიჯნავს სივრცეებს, თუმცა ამასთანავე ტოვებს სივრცის შეგრძნებას. იატაკზე გვხვდება ტერაცოს ტიპის კერამო-გრანიტის ფილები, ავეჯის სახით კი სრულად ხის ვიზუალის მქონე მასალაა გამოყენებული.
რაც შეეხება მისაღებ ოთახს, აქ უხვად არის გამოყენებული ხის ფაქტურის მქონე ავეჯი, ასევე გვხვდება რატანის ელემენტებიც. ნაზი ცისფერი ტონი და მოლდინგები სივრცეს ჰაეროვნების შეგრძნებას სძენს.
საძინებელი სადა სტილშია გადაწყვეტილი. ყურადღებას იქცევს მკვეთრი მწვანე ფერის მქონე კარადა, რომელსაც დარაბებისთვის დამახასიათებელი ფასადი გააჩნია.
აბაზანა კლასიკურ შავ-თეთრ ტონებშია დაპროექტებული და გამოყენებულია ულამაზესი გერამო-გრანიტის ფილები, რომლებიც სივრცეს ელეგანტურობას მატებს. დამკვეთის სურვილის თანახმად, ამ ზონაში გვხვდება როგორც აბაზანა, ასევე საშხაპე კაბინა და ფართობი იდეალურადაა ათვისებული.
პროექტის ავტორი: ანინია ფხაკაძე
