არქიტექტურული სტუდია Taller Mexicano de Arquitectura-ს მიერ შესრულებულმა პროექტმა იუკატანში, მექსიკაში, მსოფლიო არქიტექტურული წრეების ყურადღება მარტივად მიიპყრო. პროექტი “Bugambilias House” 263 კვადრატულ მეტრს მოიცავს და მისი მშენებლობა სრულად 2019 წელს დასრულდა. ვარდისფერი ტონალობით შეფერილი ბეტონი, რომლითაც პროექტი გამოირჩევა, კიდევ ერთი მექსიკელი არქიტექტორის, ლუის ბარაგანის ხელწერას გვაგონებს.
სახლი საკმაოდ დატვირთულ უბანში მდებარეობს, ამიტომ არქიტექტორების მიზანი იყო სახლის მფლობელი ოჯახისთვის პირადი სივრცის, ინტიმურობის უზრუნველყოფა.
პროექტში დიდი რაოდენობითაა გამოყენებული ცემენტი. სწორედ ეს მასალა ქმნის პროექტის უნიკალურობის განმაპირობებელ მონოლითურ კონსტრუქციას და შენობის გარშემო არსებულ შენობებთან მიმართებით კონტრასტულობას. სახლის დაგეგმარების მიხედვით გაჭრილი ფანჯრები და ვიტრაჟები საშუალებას იძლევა, რომ შენობიდან ექსტერიერის ტერიტორია დავინახოთ, თუმცა გარედან სახლში მიმდინარე პროცესების დანახვა შეუძლებელია.
სახლის პირველი სართული დაკავშირებულია ტერასასთან და ეზოსთან. ამ სივრცის სიდიდის გამო მფლობელები სწორედ პირველ სართულზე იღებენ სტუმრებს, აწყობენ წვეულებებსა და ოჯახურ შეკრებებს. ამავე სართულზე იქცევს ყურადღებას შიდა ეზო, რომელიც “Bugambilias House”-ს ნამდვილი გულია.
სახლის შიდა ეზო მთელი პროექტის თერმორეგულატორია. მისი ბადოვანი კედლების საშუალებით შენობის ორივე სართული ბუნებრივად ნიავდება და ნათდება კიდეც.
ფოტოგრაფი: Alejandro Loustaunau
