“რატომ არ შეიძლება ლამაზი სკამი იყოს უბრალოდ ლამაზი სკამი?” – დიზაინერ სესილი მანცის მოსაზრება

ექსკლუზიურ ინტერვიუში დანიელი დიზაინერი სესილი მანცი ამბობს, რომ ყოველდღიურმა და ესთეტიკურმა ეტიკეტებმა შეიძლება ხელი შეუშალოს ავეჯის დიზაინს.

”ინდუსტრიას უყვარს ყველაფრისთვის ეტიკეტების მიწებება”, – განაცხადა მან ინტერვიუში. 

“რატომ არ შეიძლება ლამაზი სკამი იყოს უბრალოდ ლამაზი სკამი? სანამ ის კომფორტულია, ადამიანებს შეუძლიათ თავად განსაჯონ, როგორ მუშაობს ის საუკეთესოდ.”

მანცი საუბრობს  Monolit-ზე, სკამზე, რომელიც მან დააპროექტა Fritz Hansen-თან ერთად და რომელიც ამ კვირაში პირველად იქნება წარდგენილი  3 Days of Design-ზე, კოპენჰაგენში.

Monolit-ი არის ფანერისგან შექმნილი რბილი სკამი ტყავის კიდეების ელემენტებით. არსებობს მისი ორი სხვადასხვა სიმაღლის მოდელი.

მანცის მიზანი იყო უბრალოდ სკამის შექმნა, რომელიც საშუალებას მისცემდა ადამიანებს, კომფორტულად მსხდარიყვნენ ოთახში დიდი ხნის განმავლობაში, ზედმეტი სივრცის დაკავების გარეშე.

ის ფიქრობს, რომ კლასიფიკაციები, როგორიცაა “სასადილო სკამი” და “ლაუნჯ სკამი”, დიზაინერებს ურთულებს ისეთი ნივთების შექმნას, რომლებიც პრეფერენციებისა და ცხოვრების სტილის შეცვლასთან ერთად იცვლება.

“ეს შეზღუდვაა. სკამი უნდა იყოს გარკვეული სიმაღლის ან ზომის”, ამბობს მანცი.  „ჩემი სურვილი იყო, შემექმნა ლამაზი, კომფორტული სკამი.”

ფუნქციური გაურკვევლობა კოპენჰაგენში მცხოვრები დიზაინერის ნამუშევრებში ხშირად გვხვდება.

Fritz Hansen-ისთვის შექმნილი მისი ნამუშევრები მოიცავს 2016 წელს დამზადებულ კენჭის ფორმის პუფის სავარძელს და 2023 წელს დამზადებულ ჩაზნექილ ტაბურეტს.

სხვა ბრენდთან პარტნიორობით 2020-ში მან შექმნა Takt-ის სავარძელი, ყავის მაგიდა და სასადილო მაგიდა.

”მე არ მჯერა, რომ  ძალიან ბევრი ფუნქციის ერთ ნივთში მოქცევა შესაძლებელია, მაგრამ ავეჯი თუ კარგადაა დამზადებული, მისი გამოყენება სხვადასხვანაირად უნდა შეგეძლოთ”, – განუცხადა მანცმა ჟურნალისტებს.

მანცი ყოველთვის არიდებს თავს კატეგორიზაციას, განსაკუთრებით გენდერთან დაკავშირებით.

მისი დიზაინი მინიმალისტურია, შეიცავს მხოლოდ ერთი ან ორი დეტალისგან შექმნილ ნივთებს, რომლებიც ხაზს უსვამენ პირდაპირ, ფუნდამენტურ ფორმებს. ეს ეწინააღმდეგება “ქალური დიზაინის” კონცეფციას, რომელიც ჩვეულებრივ, ხაზს უსვამს ნაზ ფერებს და მომრგვალებულ ფორმებს.

2018 წელს Dezeen-თან მიცემულ ინტერვიუში მანცმა განმარტა, როგორ უნდოდა ხანდახან ბრენდებისთვის დაემტკიცებინა, რომ არ შეესაბამებოდა გენდერულ სტერეოტიპებს, როგორც ქალი.

კითხვაზე, თვლის თუ არა თავს მისაბაძად ახალგაზრდა ქალებისთვის ინდუსტრიულ დიზაინში, მისი პასუხი იყო: “რატომ მხოლოდ ქალებისთვის?”

ზოგიერთმა შეიძლება დაახასიათოს მანცის სტილი, როგორც მარტივი ან პრაქტიკული. დიზაინერმა აღნიშნა, რომ ის, როგორც წესი, მიზნად ისახავს ისეთი ნივთების შექმნას, რომლებიც ჰარმონიზებენ სიმარტივესთან.

„არ ვფიქრობ, რომ ნამდვილი მინიმალისტი ვარ“, – აღნიშნა მან. “ეს არის მოგზაურობა. მე მუდმივად რაღაცას ვჭრი, ვცვლი, შემდეგ კი, თუ შევამჩნიე, რომ  არსი დაიკარგა, ხელახლა ვნერგავ ახალ ელემენტებს, .”

კიდევ ერთი ბრენდი, ვისთან ერთადაც მანცი 3 Days of Design-ზე წარსდგა, შვედური ხალიჩების მწარმოებელი კომპანია Kasthall-ია.

ხალიჩები მოიცავს ბუნებრივ ტონებს და დელიკატურ ფერებს.

„ჩვენ აღმოვაჩინეთ ტრადიციული მეთოდი, რომელიც საშუალებას აძლევს ხალიჩას, ზედაპირიდან ამოვიდეს“, – თქვა მანცმა.

მანცი ხაზს უსვამს დიზაინის მნიშვნელობას, რომელიც განასახიერებს მწარმოებლის მემკვიდრეობასა და იდენტობას.

ხალიჩების განვითარების შესწავლას მან ბევრი დრო დაუთმო იმისათვის, რომ  გაეგო Kastall-ის წარმოების პროცესები.

„არ მიყვარს დიზაინის შექმნა მხოლოდ იმისთვის, რომ რაღაცის შექმნაში ჩამეთვალოს“ – თქვა მან.

“როგორც დიზაინერს, მჯერა, რომ ჩემი პასუხისმგებლობაა, შევისწავლო კომპანია, ვისთანაც ვთანამშრომლობ, გავიგო მათი წარმომავლობის შესახებ და შევქმნა ის, რაც კონკრეტულად მათზეა  მორგებული.”

მანცის მიდგომებს განიხილავენ, როგორც “ძალიან ტრადიციულს”. მისი გუნდი საკმაოდ მცირერიცხოვანია. შედგება მხოლოდ მისგან და ორი თანამშრომლისგან. ის მნიშვნელოვან დროს უთმობს ესკიზებისა და სრულმასშტაბიანი მოდელების შექმნას.

”ჩვენ უბრალოდ ჩანახატებს არ ვაკეთებთ; ეს ასე არ მუშაობს”, – თქვა მან.

”მუდმივად ვცდილობ, არ შემოვიფარგლო რაიმე კონკრეტულის კეთებით და ვიყო ჩართული ყველა ასპექტში,” – განაგრძო მან. „პროცესთან თანდათან მიახლოებით, ჩვენ ვიღებთ საბოლოო შედეგს“.