თანამედროვე მინიმალისტური დიზაინით ცნობილი დევიდ ჩიპერფილდი 1953 წელს ლონდონში დაიბადა. იგი კინგსტონის ხელოვნების სკოლაში სწავლობდა და არქიტექტურის ხარისხი ლონდონის არქიტექტურული ასოციაციისგან მიიღო. დევიდმა სკოლის დამთავრებისთანავე მუშაობა ცნობილი არქიტექტორების (დუგლას სტეფენი, რიჩარდ როჯერსი და ნორმან ფოსტერი) სხვადასხვა დიზაინერულ და არქიტექტურულ ფირმებთან დაიწყო.
1985 წელს მან წამოიწყო საკუთარი ინდივიდუალური პრაქტიკა David Chipperfield Architects-ის სახელწოდებით. დევიდის საწყისი სამუშაოების უმეტესი ნაწილი იაპონიაში განხორციელდა. იგი ყოველთვის ცდილობდა ტრადიციული მოთხოვნებისა და კულტურული შეზღუდვების შერწყმას თანამედროვე, მაგრამ მინიმალისტური დიზაინის მიდგომებთან. დევიდის მგრძნობელობამ კონტექსტისა და პროექტის გარემოს მახასიათებლების მიმართ მას დიდი პოპულარობა მოუტანა ისეთ ტრადიციულ რეგიონში, როგორიცაა იაპონია. გარდა ამისა, ის მუშაობდა უამრავ პროექტზე გერმანიაში, გახსნა ოფისები ბერლინში, ლონდონში, მილანსა და შანხაიში — მთლიანობაში 260 ადამიანისგან შემდგარი პერსონალით.
დევიდ ჩიპერფილდმა თხუთმეტი წლის განმავლობაში ძალიან დიდი პოპულარობა და უამრავი ჯილდო მოიპოვა, მათ შორის — Royal Institute of British Architects (RIBA) Stirling Prize.
არქიტექტორი მკაცრად იცავს საკუთარ მინიმალისტურ სტილს. მას მოცულობებით თამაშის, ასევე სინათლისა და ჩრდილის კონტრასტული ეფექტების სჯერა.
დევიდ ჩიპერფილდი განაგრძობს მოღვაწეობას უწყვეტი ენთუზიაზმით და აპირებს იმუშაოს კომერციულ არქიტექტურაზე დამაინტრიგებელი დიზაინით არა მხოლოდ პირადი მოგების, არამედ არქიტექტურის გაუმჯობესების მიზნით.
