მზად ხართ, მხიარულ სახლს ესტუმროთ? ეს საცხოვრებელი ფერებს, ნიმუშებს და ტექსტურებს ნათელ, ღია დაგეგმარების სივრცეებში აერთიანებს და საოცარ ატმოსფეროს ქმნის.
ლონდონში მდებარე ეს ედვარდიანული ეპოქის სახლი ინგლისური საყოფაცხოვრებო ნივთების ბრენდის — Alice Palmer & Co-ის დამფუძნებლის, ალისა პალმერის მიერ არის გაფორმებული და მასვე ეკუთვნის. მისი საყოფაცხოვრებო ნივთები ტრადიციული ბრიტანული სახლების, დასავლეთ ინდოეთის ვილებისა და ანდალუსიის ჰასიენდების ინსპირაციით არის შექმნილი და ეს გავლენები ალისას სახლშიც იგრძნობა.
ალისას მომხიბვლელი სახლი გაფორმებულია რბილი ფერებით, მხიარული ნიმუშებით, ავეჯისა და დეკორის ეკლექტიკური ნაზავით. შედეგი კი ნამდვილი საოცნებო სახლია.
სახლის უკანა მხარეს დამატებულია ახალი სივრცე, რომელიც ახლა მსუბუქი, ღია დაგეგმარების სამზარეულოს, სასადილოსა და საცხოვრებელ ფართს აერთიანებს. ჭერზე დამონტაჟებული ორი დიდი ფანჯარა, ასაწევი ფანჯრები და ფრანგული კარები ამ ოთახს სინათლით ავსებს და ბაღთან კავშირით უზრუნველყოფს. ეს სივრცე სტუმრების მისაღებად არის შექმნილი, რადგან ის მრავალი მყუდრო მოსასვენებელი ზონითა და დიდი სასადილო მაგიდით არის აღჭურვილი.
აღსანიშნავია, რომ სახლის ყველა კედელი ხელოვნების ნიმუშებით არის მორთული. საგულდაგულოდ შერჩეული კოლექცია სახლს პიროვნულობას მატებს.
სახლის წინა მხარეს განლაგებულია მომხიბლავი მისაღები ოთახი თბილი ყვითელი კედლებით და წითელი ფერის აქცენტებით. ამ სივრცის მთავარ წერტილს წარმოადგენს ბუხარი, რომელიც, ცნობილი ტკბილეულის მსგავსად, წითელი და თეთრი ზოლებით არის გაფორმებული.
მთავარი საძინებელი, უზარმაზარი ფანჯრებისა და შემინული სახურავის წყალობით ნათელი ოთახია, რომლიდანაც ულამაზესი ხედი იშლება ბაღზე. აქვე გვხვდება ჯადოსნური საბავშვო ოთახი, რომელიც ასევე გამოირჩევა ფერებისა და ტექსტურების მრავალფეროვნებით.
