მიეკუთვნებით თუ არა შემოქმედებითი ადამიანების იმ კატეგორიას, რომელიც არასოდეს ერიდება გამოწვევებს? გსურთ წარმოიდგინოთ სახლი სუფთა ტილოდ, რომელზეც შეგიძლიათ გამოსახოთ თქვენი ფანტაზიები და შექმნათ სივრცე, რომელიც ნამდვილად შეესაბამება თქვენს პიროვნებასა და ხასიათს? თუ ამ კითხვებზე პასუხები დადებითია, მაშინ ეს სტატია თქვენთვისაა.
რა არის გრანჟი ინტერიერში?
ეს არის ერთ-ერთი ორიგინალური მიმართულება ინტერიერის დიზაინში, რომელიც საკუთარ თავში აერთიანებს ერთი შეხედვით ერთმანეთთან შეუთავსებელ ცნებებს – მოუწესრიგებელ უბრალო გაფორმებასა და სოლიდურობას. ამ კომბინაციის საშუალებით შესაძლებელი ხდება სახლში მყუდრო ატმოსფეროს შექმნა დიდი რაოდენობის აქსესუარებისა და მკვეთრი დეტალების გარეშე. ქვემოთ შემოგთავაზებთ 8 რჩევას გრანჟის სტილის ინტერიერისთვის, რომელიც თქვენს სახლის გარდაქმნაში დაგეხმარებათ.
გრანჟის სტილის კედელი
ამ სტილის არსის გამოსახატად ერთ-ერთი ყველაზე მნიშვნელოვანი გადაწყვეტა გრანჟის სტილის ფუნქციური კედლის შექმნაა. ქვემოთ მოცემულია 3 ძირითადი მიმართულება, რომელსაც უნდა დაეყრდნოთ:
- ხელოვნური ბეტონის კედელი
- დაუმუშავებელი თაბაშირის კედელი
- ბეღლის ხის პანელი
ხელოვნური ბეტონის კედელი
რა თქმა უნდა, შეგიძლიათ ნამდვილი ბეტონის კედელი გამოიყენოთ. ვერაფერი შეედრება რეალურს, თავისი გლუვი გარეგნობითა და ტექსტურით, თუმცა, ეს შრომატევადი სამუშაოა, რომელიც დიდ ხარჯებთან და არეულობასთან არის დაკავშირებული.
დაუმუშავებელი თაბაშირის კედელი
ნედლი თაბაშირის კედელი არის შეუღებავი ზედაპირი, რომელიც ამ მასალის ლამაზ წითელ და ვარდისფერ ელფერებს გაბრწყინების საშუალებას აძლევს. შეგიძლიათ თაბაშირი კედელს ისე წაუსვათ, რომ გლუვი ზედაპირი მიიღოთ ან უხეშ ტექსტურაზე ორიენტირდეთ.
ბეღლის ხის პანელი
არის რაღაც ბეღლის ხის პანელებში, რაც გრანჟის სტილის დეკორაციის ესთეტიკას შესანიშნავად ასახავს. ეს არის ერთ-ერთი საუკეთესო გზა თქვენი სახლისთვის ამ სტილის ელფერის შესაძენად.
- წარმოაჩინეთ ბუნებრივი მასალები
ბეტონის კედლებთან და ინდუსტრიულ განათებასთან ერთად, არ დაგავიწყდეთ თქვენი სახლის ბუნებრივი ელემენტებით შევსება:
- მიწიერი ფერები
- უხეში და მზა ტექსტურები
- უნიკალური და თამამი დიზაინი
ბეტონის აქსესუარები, მაგალითად, ყავის მრგვალი მაგიდა, იდეალურად ერწყმის იმ კედლებს, რომლებზეც პირველ პუნქტში ვისაუბრეთ. ისინი წარმოუდგენლად ელეგანტურად გამოიყურება გრანჟის სტილის კედელთან კომბინაციაში.
- ინდუსტრიული სტილის განათება
აუცილებელია ხაზგასმით აღვნიშნოთ კარგი განათების მნიშვნელობა. არა მხოლოდ დადასტურებული დადებითი ფსიქოლოგიური ზემოქმედების გამო, არამედ სტილის თვალსაზრისითაც. კონცენტრირდით განათების შემდეგ ვარიანტებზე, რათა გრანჟის სტილის ინტერიერი შეავსოთ:
- რატანის საკიდი სანათი
- ლითონის სანათი
- ბეტონის სანათი
რატანის სანათი
რატანი ხელმისაწვდომია ბუნებრივ ან მბზინავ შავში და ეს მასალა ნამდვილად დაგეხმარებათ თვალწარმტაცი ესთეტიკის შექმნაში.
ლითონის სანათი
გირჩევთ, აირჩიოთ ინდუსტრიული, დიდი ზომის ლითონის ან მავთულის ბადისებრი საკიდი სანათი. ეს არის სტილი, რომელიც განათების მიმართულებით ახლა სწრაფად იძენს პოპულარობას.
ბეტონის სანათი
ხელოვნური ბეტონის კედლის შესავსებად ბეტონის საკიდი სანათის გამოყენება შესანიშნავი გადაწყვეტაა. ეს ელემენტი ნათლად გამოხატავს გრანჟის ინტერიერის არსს.
- გაცვეთილი და რუსტიკული იატაკი
თუ კომფორტი თქვენი მთავარი პრიორიტეტია, სქელი ხალიჩის გამოყენების საწინააღმდეგო არაფერი გვაქვს. მაგრამ ახლა ამის შესახებ არ ვსაუბრობთ. გრანჟის სტილის ჭეშმარიტად წარმოსაჩენად, ამ 2 გზის შესახებ უნდა დაფიქრდეთ:
- აღდგენილი ხის იატაკი
- დიდი ზომის ბეტონის ფილები
თუ ძველი ხის იატაკის აღდგენის ნაცვლად, მარტივი გზის არჩევა გსურთ, შეგიძლიათ ორიენტირდეთ ვარიანტზე, რომელსაც ძველი ხის იატაკის ეფექტი აქვს. რაც შეეხება ბეტონს, მისი იატაკზე დასხმა საკმაოდ დიდ თანხებთან და სირთულეებთან არის დაკავშირებული. ამიტომ, შეგიძლიათ გამოიყენოთ ხელოვნური ბეტონის ფილები, რომლებიც იგივე სამუშაოს შეასრულებს და, ამასთან, ფანტასტიკურად გამოიყურება.
- სტილი გაცვეთილი ქსოვილებით
გაცვეთილი ქსოვილები კომფორტის საჭირო ელემენტს მატებს სახლის დეკორაციის სტილს, რომელიც ცნობილია თავისი მკაცრი ესთეტიკით. გაითვალისწინეთ, რომ გაცვეთილში არასასიამოვნო არ იგულისხმება. რბილი ბამბის დაძველებულ ქსოვილს შეუძლია არა მხოლოდ მიმზიდველობა შესძინოს თქვენს საძინებელს, არამედ შეგინარჩუნოთ სიმყუდროვე და სითბო ზამთრის ცივ ღამეებშიც.
- ინდუსტრიული აქსესუარები
გრანჟის ინტერიერის დიზაინი უნიკალურია. ასე რომ, გამოიყენეთ უჩვეულო აქსესუარები და ნება მიეცით თქვენს ფანტაზიას, გათავისუფლდეს.
აი, იმ ნივთების სია, რომლებმაც შეიძლება შთაგაგონოთ:
- იატაკის დიდი ლარნაკები
- ბეტონის საათები
- ხისა და ლითონის ბარის სკამები
- მაროკოული აქსესუარები
- ინდუსტრიული სარკეები
- აბსტრაქტული ხელოვნების ნიმუშები
თქვენი გრანჟის სტილის კედლის შესავსებად ერთ-ერთი საუკეთესო გზა დიდი ზომის აბსტრაქტული ხელოვნების ნიმუშია. ეს ორი რამ კი უნდა გაითვალისწინოთ:
- ნამუშევრის ზომა
- გამორჩეული ფერთა პალიტრა
ხელოვნების ნიმუში ნამდვილად გარდაქმნის სახლის იერსახეს და ატმოსფეროს, ამიტომ დაუთმეთ დრო მის შერჩევას და შეიძინეთ ნამუშევარი, რომელიც თქვენში სასურველ გრძნობებს იწვევს.
- ფიქსირებული დეტალები
აი, რამდენიმე სახლის პატარა დეტალი, რომლებიც მხედველობიდან არ უნდა გამოგვრჩეს:
- რადიატორები
- კარის სახელურები
- ჩამრთველები
რადიატორები
გრანჟის სტილის კედელი მხოლოდ მანამ გამოიყურება საოცრად, სანამ მასზე თეთრ რადიატორს დაამონტაჟებთ. იმისთვის, რომ სტილს არ გასცდეთ, შეგიძლიათ ვინტაჟური რადიატორი შეარჩიოთ, რომელიც გრანჟს შესანიშნავად შეესაბამება.
კარის სახელურები
კარის სახელურები არის ფიქსირებული დეტალები, რომლებიც ძალიან ხშირად შეუმჩნეველია. ბრინჯაო, სპილენძი და ნაჭედი რკინა არის შესანიშნავი არჩევანი, რომელიც გრანჟის სტილის დიზაინის შევსებაში დაგეხმარებათ.
ჩამრთველები
თეთრი პლასტმასის ჩამრთველები და როზეტები ბეტონის კედლისთვის სრულიად შეუსაბამოა. ამის ნაცვლად შეგიძლიათ უჟანგავი ფოლადის ან ბრინჯაოს აქსესუარები გამოიყენოთ. თვით გადამრთველებიც კი შეგიძლიათ ვინტაჟური, ბურთულიანი გადართვის სტილით შეცვალოთ.
