ნებისმიერ ტიპის რემონტს დრო და ძალისხმევა სჭირდება. ამ შემთხვევაში ორი ვარიანტი არსებობს: თქვენ შეგიძლიათ საქმე სპეციალისტებს ანდოთ ან ყველაფერი საკუთარ თავზე აიღოთ. დღევანდელ სტატიაში სწორედ მეორე გზაზე ვისაუბრებთ და განვიხილავთ, თუ როგორ უნდა გავაკეთოთ რემონტი დამოუკიდებლად.
როგორი შეიძლება იყოს რემონტი?
რაც შეეხება ტიპებს, შეგვიძლია კაპიტალური და კოსმეტიკური რემონტი განვასხვაოთ. პირველი ვარიანტის შემთხვევაში მასშტაბური ცვლილებები ხორციელდება, ხოლო კოსმეტიკური რემონტი ნაკლებად მოცულობითი და უფრო იაფია. ეს უკანასკნელი დეკორატიულ ცვლილებებს გულისხმობს. მიზანი, როგორც წესი, ატმოსფეროს გახალისებაა.
პროცესისთვის მომზადებისას აუცილებელია, განსაზღვროთ რემონტის ტიპი, რადგან სამუშაოს საბოლოო ღირებულებაც სწორედ ამაზე იქნება დამოკიდებული. შეგიძლიათ წაიკითხოთ სპეციალური ლიტერატურა ან გაიაროთ კონსულტაცია გამოცდილ ადამიანებთან.
რას უნდა მივაქციოთ ყურადღება რემონტის დამოუკიდებლად გაკეთების დროს?
პირველ რიგში, უნდა განსაზღვროთ სამუშაო სივრცის გეგმა, რომელშიც ბინის ყველა მახასიათებელი (ოთახების ფართობი და ჭერის სიმაღლე) უნდა იყოს ასახული. ამის შემდეგ, სივრცე, ფუნქციების მიხედვით, ზონებად უნდა დაყოთ. შემდეგ გაირკვევა, თუ რა და როგორ განთავსდება თითოეულ ოთახში. ამ მიდგომით ბინის გარემონტება უფრო ადვილი იქნება.
ჯერ უნდა მოამზადოთ ზედაპირები — ისინი ძველი ფენებისგან უნდა გაწმინდოთ და ნაკლოვანებები გამოასწოროთ. უფრო მოცულობითი რემონტის შემთხვევაში, შეიძლება ფანჯრები და კარებიც გამოიცვალოს. უმჯობესია, ეს საქმე სპეციალისტებს მიანდოთ, რადგან დამოუკიდებლად ეს სამუშაო საკმაოდ რთული შესასრულებელია.
ჭერისა და კედლების გასწორება დროსა და გარკვეულ ძალისხმევას მოითხოვს. სამუშაოს შესასრულებლად დეტალური ინსტრუქციები შეგიძლიათ ინტერნეტში მოიძიოთ. დეკორატიული მოპირკეთება ცალკე ეტაპია, რომელიც კედლების შეღებვას ან შპალერის გაკვრას გულისხმობს. ეს შეიძლება სხვისი დახმარების გარეშე გაკეთდეს და, შესაბამისად, ფულის დაზოგვასაც შეძლებთ. შპალერის გაკვრისას შაბლონები ერთმანეთს უნდა ემთხვეოდეს, ხოლო კედლების დამოუკიდებლად შეღებვისას მთავარია აკურატულობა გამოიჩინოთ.
