დღე-ღამეში სულ მცირე ექვს საათს ვატარებთ ბალიშთან, ამიტომ მისი სწორად შერჩევა ძალიან მნიშვნელოვანია. დღეს სწორედ იმაზე ვისაუბრებთ, თუ როგორ მოვძებნოთ ყველაზე კომფორტული და ჯანსაღი ვარიანტი ძილისთვის.
ზომა
უმჯობესია, ბალიში იმ პოზიციიდან გამომდინარე შეარჩიოთ, რომელშიც ჩვეულებრივ გძინავთ. თუ ძირითადად გვერდზე გძინავთ, მაშინ ჯობია არჩევანი მაღალ ბალიშზე შეაჩეროთ. თუ ზურგზე ან მუცელზე წოლას ამჯობინებთ, მაშინ – დაბალი. მათთვის, ვინც მუდმივად იცვლის პოზიციას, უმჯობესია რაღაც შუალედური ვარიანტი ან ერთდროულად ორი ბალიშით (საშუალო და დაბალი სიმაღლის) ძილი.
მასალა
ბალიშებისთვის საუკეთესო მასალებია ბუნებრივი ქსოვილები, როგორიცაა ბამბა ან აბრეშუმი. ასევე მნიშვნელოვანია ქსოვილის სიმკვრივე, რადგან თხელი ქსოვილი ნაკლებად გამძლეა და, შესაძლოა, გარკვეული პერიოდის შემდეგ ბალიშის მთლიანობა დაირღვეს. ასევე, უფრო მკვრივი ქსოვილი არბილებს შემავსებლის ჰეტეროგენულობას, რაც მძინარე ადამიანის კომფორტზე დადებითად მოქმედებს. ყურადღება მიაქციეთ შეკერვის ხარისხს. დახრილი ხაზები და არათანაბარი ნაკერი უხარისხო წარმოებაზე მიუთითებს.
შემავსებელი
თუ ბუმბულის ბალიშს ყიდულობთ, შეამოწმეთ, ბუნებრივია ის, თუ ხელოვნური. ნატურალური შიგთავსის მქონე ბალიშებს შორის სიახლეა აბრეშუმის ბალიშები. მათ შიგნით არის აბრეშუმის ბოჭკოები. აბრეშუმს, ქიმიური შემადგენლობის გამო, „მეორე კანს“ უწოდებენ. გასუფთავებული აბრეშუმი ჰიპოალერგიულია. აბრეშუმის ბალიშების კიდევ ერთი პლუსი მათი გამძლეობაა. თუ მოვლის მარტივ წესებს დაიცავთ, ბალიში, ორიგინალური ფორმის დაკარგვის გარეშე, ძალიან დიდხანს მოგემსახურებათ. თუმცა ყველა მწარმოებელმა არ იცის როგორ შექმნას აბრეშუმის კომფორტული ბალიშები. ყველაფერი გამოყენებული მასალების ხარისხსა (შემავსებელი და ქსოვილები) და თავად წარმოების ტექნოლოგიაზეა დამოკიდებული. საქმე იმაშია, რომ თითოეული აბრეშუმის ბალიში ექსკლუზიურად ხელით მზადდება და ყოველი მწარმოებელი ამას საკუთარი ტექნოლოგიის მიხედვით აკეთებს. უმეტეს შემთხვევაში, აბრეშუმის ბალიშებისთვის რეკომენდებულია ქიმწმენდა.
სინთეტიკური ბალიშები ძირითადად მზადდება სხვადასხვა ბოჭკოებისგან, რომლებიც წარმოების ტექნოლოგიით, გამძლეობითა და ტაქტილური მახასიათებლით განსხვავდება. ასეთი ბალიშის უპირატესობებია: სინთეტიკა არ იწვევს ალერგიას, ეს ბალიშები მსუბუქი და შედარებით იაფია, კარგად ატარებს ჰაერს, ადვილი მოსავლელია. მინუსები: თავდაპირველი ფორმის სწრაფი დაკარგვის გამო შედარებით მოკლე მომსახურების ვადა.
თუ ალერგიული ხართ, გახსოვდეთ, რომ სრულყოფილი ბალიში არ არსებობს. ზოგიერთ შემთხვევაში შესაძლებელია ბალიშის ინდივიდუალურად დამზადებაც ქარხანაში. აუცილებლად იყიდეთ ბალიში, რომელიც გაუძლებს ხშირ რეცხვას. ასევე უნდა შეიძინოთ დამატებითი დამცავი საფარი და კვირაში ერთხელ 95 გრადუსზე გარეცხოთ ის.
ელასტიკურობა
ბალიშის ხარისხი მისი ელასტიკურობით განისაზღვრება. ჩაატარეთ რამდენიმე ტესტი. დასაწყისისთვის, ბალიშს უბრალოდ ხელისგული დააჭირეთ. მაღალი ხარისხის ბალიში პირვანდელ ფორმას 3-5 წამში აღადგენს. თუ ეს არ მოხდა ან ბალიში ფორმას ნელ-ნელა აღიდგენს, დიდი ალბათობით მასში ცოტა შემავსებელი ან დიდი რაოდენობით ქათმის ბუმბულია. მეორე ტესტი: აწიეთ ბალიში ერთი კუთხით და შეანჯღრიეთ. თუ ის ერთ მხარეს ნახევრად ცარიელი აღმოჩნდა, ეს ნიშნავს, რომ მასში საკმარისი რაოდენობით შემავსებელი არ არის. ძილის დროს თქვენი თავი ბალიშში ჩაიძირება, რაც თავისუფლად სუნთქვაში შეგიშლით ხელს.
