სამზარეულოს კუნძულზე ნიჟარის დამონტაჟება აერთიანებს ფუნქციონალურობასა და თანამედროვე სტილს. ის ქმნის მყუდრო და კომფორტულ გარემოს სამზარეულოში.
რა უნდა გავითვალისწინოთ რემონტის ეტაპზე, როდესაც სამზარეულოს ნიჟარის დამონტაჟება სტანდარტული კედლის კარადის ნაცვლად, კუნძულზე გვსურს?
სივრცის დაგეგმვა
ნიჟარის გარშემო საჭირო იქნება სივრცე, რათა წყლის შხეფებმა არ დააზიანოს სხვა ზედაპირები ან ხელსაწყოები. სტანდარტული სიმაღლე სამზარეულოს კუნძულის ზედაპირისთვის დაახლოებით 95-106 სმ-ია. დარწმუნდით, რომ ეს სიმაღლე კომფორტულია ნიჟარის გამოყენებისთვის. ამასთანავე, კუნძულიდან უნდა ამოიჭრას სასურველი ნიჟარის ზომა.
ზედაპირის მასალა ნიჟარის გარშემო
ნიჟარის გარშემო ზედაპირის მასალას აქვს როგორც ფუნქციონალური, ისე ესთეტიკური დატვირთვა. მისი სწორად შერჩევა უზრუნველყოფს ხანგრძლივ გამოყენებას. ნიჟარასთან ხშირად ხვდება წყალი, ამიტომ ზედაპირი უნდა იყოს წყალგამძლე. მასალები, როგორიცაა კვარცი და გრანიტი, კარგად უძლებს წყლის ზემოქმედებას, განსხვავებით ლამინატისგან, რომელიც შეიძლება ადვილად დაზიანდეს წყლის ზემოქმედებით. ნიჟარის გარშემო ზედაპირი უნდა იყოს მდგრადი ნაკაწრების მიმართ. მყარი მასალები, როგორიცაა გრანიტი და უჟანგავი ფოლადი, უკეთ უძლებს ასეთ ზემოქმედებას. ისეთი მასალა როგორიცაა მარმარილო, ლამაზია, მაგრამ ადვილად იწოვს სითხეებს, რაც ლაქების გაჩენის რისკს ზრდის. კვარცის ზედაპირი კი ამ მხრივ უფრო პრაქტიკულია.
ნიჟარის მასალა
სამზარეულოს ნიჟარის მასალის არჩევა ძალიან მნიშვნელოვანია, რადგან ეს განსაზღვრავს როგორც ნიჟარის ფუნქციონალურობას, ისე მის გამძლეობასა და ესთეტიკურობას. ნიჟარის მასალა პირდაპირ ახდენს გავლენას მის ყოველდღიურ მოხმარებაზე და ხანგრძლივობაზე. ის უნდა იყოს მდგრადი ნაკაწრებისა და დარტყმების მიმართ. მაგალითად, უჟანგავი ფოლადი არის გამძლე და ნაკლებად ზიანდება მძიმე ნივთების ზეწოლისგან. ნიჟარა უნდა იყოს მარტივად გასაწმენდი, რადგან ის მუდმივად ბინძურდება საკვებითა და ცხიმით. უჟანგავი ფოლადი ადვილად იწმინდება, თუმცა შესაძლოა დატოვოს წყლის ლაქები. გრანიტი და კერამიკა კი უკეთ ინარჩუნებს სისუფთავეს.
მონტაჟის სპეციფიკა
ცხელი და ცივი წყლის მიწოდებისთვის საჭიროა კუნძულიდან 100 მმ-იანი სიფონის ამოყვანა. ასევე მნიშვნელოვანია ნარეცხი წყლის გამავლობისთვის 50-იანი მილის ნიჟარის ქვეშ დამონტაჟება. იმისათვის, რომ თავიდან ავიცილოთ ნიჟარიდან ამომავალი უსიამოვნო სუნი, კუნძულის ქვემოთ შეგიძლიათ დააყენოთ 100-იანი ზამბარისებრი მილი.
წყლის მიწოდების მილები და კანალიზაციის გამწოვი სისტემა კუნძულამდე უნდა იყოს მოქცეული იატაკში. გაითვალისწინეთ, რომ მილების გაყვანა მოითხოვს იატაკის წინასწარ გაჭრას, რაც უნდა მოხდეს რემონტის ეტაპზე. ნიჟარიდან წყალი და ნარჩენები არხებით გადის გარეთ, რაც საჭიროებს არხების სწორ განლაგებას.
