River Hills Residence მექსიკური არქიტექტურული სტუდიო Miró Rivera Architects-ის მიერ დაპროექტებული თანამედროვე სახლია. ის მდინარე კოლორადოს წყალსაცავთან მდებარეობს და მოიცავს 7 ჰექტარ მიწას.
ამ კომპლექსის შექმნისას ძირითადი მიზანი იყო ისეთი დასასვენებელი სივრცის შექმნა, რომელიც ბუნებასთან უშუალო კავშირში იქნებოდა.
სახლის ნაწილი მოთავსებულია მიწის ბრტყელ ზედაპირზე. მის სამხრეთ ნაწილში, პირველ სართულზე განთავსებულია ოთხი საძინებელი და კიბე, რომელიც უკავშირდება დასასვენებელ ოთახს. დასასვენებელი სივრცე მაღალი ჭერითა და ორი შუშის კედლითაა გაწყობილი, საიდანაც იშლება ტბისა და ბაღების ულამაზესი ხედები. ოთახში არსებული ხის დეტალები ჰარმონიულად ერწყმის გარეთ არსებულ ხედებს, რაც საბოლოო ჯამში, მყუდრო ატმოსფეროს ქმნის. აქვე მოთავსებულია შავი ქვის ბუხარი, რომელიც ჩასმულია ბეტონის კედელში, მათთან კი შეხამებულია ნაცრისფერი ტყავის სავარძლები. აქ არსებული ფერთა პალიტრა ორგანულად ეხამება ბუნების ხედებს და ქმნის დახვეწილ სივრცეს.
სტუმრების მისაღები ოთახი, რომელიც ხის ჭერით, ბეტონის იატაკითა და შუშის კედლით არის გაწყობილი, ქმნის თანამედროვე და მყუდრო ატმოსფეროს. ხის ჭერს ჰარმონიულად ერწყმის ნარინჯისფერი დივანი და ასევე ნარინჯისფერი დეტალების მქონე ხალიჩა. შავი აქსესუარები, რომლებიც მინიმალურადაა ჩართული, დამატებით კონტრასტს უწყობს ხელს. ოთახიდან მოჩანს ტბაზე მოთავსებული დეკი, რომელსაც ოთახში არსებული მინიმალისტური დეტალები ჰარმონიულად ერწყმის.
ორ-სართულიანი დეკი საშუალებას იძლევა გართობისთვისა და დასვენებისთვის. პირველ სართულზე მიერთებულია ნავები, ხოლო მეორეზე გარე მისაღებია მოთავსებული. მისი ღია კონსტრუქცია ფერითა და მასალებით შეუმჩნევლად ერწყმის გარემოს.
რუბრიკის წარმდგენია “ალიანს ჯგუფი”
