ჰოლანდიაში, აინდჰოვენში მდებარე ეს ვილა 240 კვადრატული მეტრის ფართობზეა აშენებული. Studioninedots-ის პროექტის მიხედვით ვილის შემადგენელი ნაწილები თავისუფალი, სივრცულია და მონაცვლეობს ექსტერიერიდან ინტერიერში – აქ ოჯახური ცხოვრება მიმდინარეობს როგორც კედლებს შიგნით, ასევე მათ მიღმა, გარეთ. ამ არქიტექტურული გადაწყვეტილების საშუალებით სახლის ვიზუალი იზრდება და ოჯახის წევრები ერთმანეთთან მუდმივ კავშირს ინარჩუნებენ.
ვილა „Fifty-Fifty“ არქიტექტურული სტუდიისთვის ექსპერიმენტული პროექტი იყო, ვინაიდან მათ ეს შესაძლებლობა გამჭვირვალე სახლის შესაქმნელად გამოიყენეს. პროექტი მინიმალისტური, ბუნებასთან ინტეგრირებულია და აქ თანაბრად მნიშვნელოვანია როგორც მისი საშინაო, ასევე საგარეო, ექსტერიორის ფუნქციები.
სახლის ორი ჰორიზონტალური ნაწილი ერთმანეთთანაა დაკავშირებული და პავილიონის მსგავს სტრუქტურას ქმნის, რომელიც ბაღში იშლება და თითქოს ლანდშაფტი შეაქვს სახლში. საინტერესოა ასევე ვილის სახელწოდება – “Fifty-Fifty”, პროექტის ავტორების თქმით, ეს იმით აიხსნება, რომ ის ნახევრად სახლია, ნახევრად კი – ბაღი.
ვილაში საშინაო ფუნქციების მქონე ოთახები განლაგებულია როგორც ჰორიზონტალურად, ასევე ვერტიკალურად. მშობლების საძინებელი ოთახი პირველ სართულზე მდებარეობს, მათი გოგონების კი სახლის კოშკისებური კონსტრუქციის მქონე ვერტიკალურ ნაწილშია განთავსებული.
დიზაინი ინდუსტრიული მასალითაა დაკომპლექტებული და ნაცრისფერი ფერის პალიტრაშია გადაწყვეტილი. ბუნებრივია, გარემოსა და ინტერიერს შორის არსებული საზღვრის წასაშლელად ძირითად მასალად მინაა გამოყენებული. მთავარი სააბაზანო ფილაქნითაა მოპირკეთებული. მრგვალი ფარდული ნახევრად გამჭვირვალე გოფრირებული პოლიკარბონატისგანაა აგებული, გაპრიალებულ, დამუშავებულ ალუმინში „გახვეული“ სახლის კოშკისებური კონსტრუქცია ფაქიზად ირეკლავს ლანდშაფტს და თითქოს შენიღბულ ზედაპირს ქმნის, რომელიც სეზონებისა და ამინდების ცვლილებას ასახავს.
ფოტოგრაფი: Frans Parthesius
რუბრიკის წარმდგენია: “ალიანს ჯგუფი”
